de schönschti Mönsch besch för mech emmer du gsi
rosarot, rosarot
wie det am Fenschter gschtande besch

hesch grossi Auge gmacht
wo der ufgfalle esch
es goht mer glich wie der,
ond mer send nie meh eleige hei

ond de laufsch weder öbers Wasser
ond glaubsch die gröschti Lügerei
seisch mer, ech lösi ohni Basis
seisch, ech be so lieber weder elei

wie föhnts au so a die Beziehige,
wie hebeds Johre a,
uf was chonds drufa,
hemmer üs gfrogt ond send secher gsi
üsi esch voll debi, die Ewig zsi

händ üs erwanderet,
händ üs au wachse gloh,
nodisno,
du ond ech,
echli meh du, echli meh ech,
wer verweigeret sech

guet, echli Realität hemmer doch au gschpört
im Job, ide Nöt,
Nochrechte, Videos, Parole
mer hend Meinige beldet, iibeldet, as gäbs käis Morn

mer hend öber alles chönne rede
donkelschwarz, donkelschwarz
ond üs nütme zsäge gha

I mim Läbe
roll ech vo Rolle
zo Rolle
onufhaltsam
onbeständig
im Floss vom Läbe

strample om Balance
ond vergese debi
das ech jo tanze cha
tanze cha

du weisch, es get kei Kepten uf dem Scheff
du weisch, du tribsch so omenand, förchtisch jede Grond
förchtisch d Wälle, s Wasser, d Chraft vom grosse Blau
de Honger ond de Dorscht, was dänked die andere au

du weisch, elei eschs rächt schwerig, zäme au
du weisch, sech zverstoh, bedütet sech sälber zverloh
förchtisch d Freiheit, d Möglechkeit, d Macht vom grosse Blau
Sägel ine, s Schtürrad a Aschlag chreislisch is Grau

nemm bloss kei Schlock
nemm en Schlock
nemm bloss kei Schlock
nemm en Schlock

du zwiflisch no bim Senke

ou dä Drock,
dä Drock,
wettisch eifach
weder zrogg

mach di uf ond fang a trenke

dis Scheff löst sech uf
du wersch körperlos
imne Meer vo Körper

breitisch dech us
ond blibsch doch ganz du

alli eis, es All-Ei, elei

I de Nacht lüchtid
vo de Bärge d Liëchter,
wyssi Fädere ond Spendle säglid
ond Nodle dor e schtärneverschprötzti Hemu,
wo mini Fröid wi ne Süle treyd
met andere gebrächleche Süle.
I de Nacht lüchtid d Vecheersampele,
grüen ond rot ond
brav wartet de Soudat,
schtemmt syni Fuëss ufs Pedau,
de Motor hötterlet uskchopplet.
Was warte mer?
Vo de Bärge lüchtid d Liëchter.

Es beschtod e ke Zwyfu
dass es e Schlachthof esch
wo mer üses Läbe drenn verbrengid
Auerdengs
mömmer deför sorge
dass mer met dene chönid is Gschpröch cho
wo eres Tablett wi Geischterfahrer
dor d Teschreije
vo de Kantine träägid.

d Ochse oni zmöögge
brächid id Chnöi.
Aber i de verschneyte Wäuder
wartet de Hersch ruig bi sinere Chue
suecht ganz zärtlech eres Gsecht
met synere samtige Nase.

Am früeche Morge
am offnige Feischter vo erem Schlofzemmer
stod e Frou.
Öber de Högle
serschte Liecht vom Tag.
Donde i de Bösch
s Zwetschere vonere Amsle.
De huuret si abe
is Gängli näbe eres Bett
as wett si sech verstecke
vor dere Wäut.

Doss of de rägenasse Stross
pfoderet of ere Väschpa
e Maa verby.
Veraastautet e Krach
herrlech wi am erschte Tag
vo de Schöpfig.

Sesch Nacht ond
sEntsetzleche fent e ke Schlof
niemer wo mi as Meer wörd füere
drom goni zo dere Brogg
wo scho lang de Floss
met emmer sebezä Spröng öberquert
sini Wäue di reysid as Meer ond wärdid no lang ned müed
so lonis lo blybe
wöu scho gly de Taag sis Liecht wi ne Storm
as Ufer vo de ohnmächtige Mönsche schpöizt
Wi esch di Wäut doch herrlech yggrechtet
sis gläsige Ohr
bhautet de Zombi i de hohle Hand
ond eis Grab oms ander god luutlos för nen uuf
schänkt em Byschlof
ond Schnäppli
ond Trooscht

Wegohtsweschtohts?
Tanggätanggä
äs goht wes schtoht
und schtoht wes goht
commssicommssa
commssacommssi
goht uufundaab
schtoht solalaa
goht lasidoo
schtoht soreree
schtoht sododoo
goht dosilaa
schtoht sososoll
goht solfamii
Etz loomisii

Zwee Vätter
zwoo Töchter
än Sohn

Zwee Brüeder
zwoo Gusiinä
än Gusää

Zwee Önkel
zwoo Nichtä
än Näffä

Git gopferteli
füffzä Persoonä
Da cha doch nöd sii

Ggsoffä hemmär
im Ganzä nöd meh
als zwoo Fläschä Wii

Aber idä Matti
bini scho immer
ä Fläschä gsii

Wot gohsch wot schtohsch isch ganz egaal
äs menschelät halt überaal
Äm Morgä chunnt dä Puur in Schtall
För s Ross isch daa än klaarä Fall
und idä Bank bim Überfall
teenggt dää am Schaalter
Ganz normaal
Än Schputnik raast mit Überschall
duruus is All
und fahl und kahl
schtuunt s Moochalb us sim Mooschtaubschtall
teenggt sini Sach uf jedä Fall
Sogäär dä Liäbgott hät ka Wahl
dää nämmli chunnt im Beetlehemschtall
aus einer Jungfrau sonder Qual
als Gööfli is Neandertaal
För Ox und Esel klaarä Fall
Äs menschelät halt überaal